மத்திய அமைச்சராக இருந்த ராசா 2 ஜி ஸ்பெக்ட்ரம் அலைவரிசை விற்றதில் ஒரு லட்சத்து 76 ஆயிரம் கோடி இழப்பீடு ஏற்பட்டுள்ளதாக ஆய்வறிக்கை வந்ததையடுத்து ராசா மற்றும் அதிகாரிகள் ஸ்வான் நிறுவன உரிமையாளர் சாகித்உஸ்மான் பல்வா ஆகியோர் கைது செய்யப்பட்டனர். தற்போது அனைவரும் திகார் சிறையில் அடைக்கப்பட்டுள்ளனர். கடந்த 15 நாட்களாக நடத்திய விசாரணையில் வழக்கில் நல்ல முன்னேற்றம் ஏற்பட்டுள்தாகவும், பல்வேறு ஆவணங்கள் சிக்கியிருப்பதாகவும் சி.பி.ஐ., தனது விசாரணையில் அரசியல் தலையீடு இல்லை என்றும் உச்ச நீதிமன்றத்தில் கூறியிருந்தது.
இந்நிலையில் ஸ்வான் நிறுவனத்திற்கு ஸ்பெக்ட்ரம் விற்கப்பட்டதில் அந்நிறுவனம் ஆயிரத்து 537 கோடிக்கு வாங்கிய சில மாதங்களிலேயே 4 ஆயிரத்து 200 கோடிக்கு விற்று கொள்ளை லாபம் பெற்றது. இதனைத் தொடர்ந்து இந்த நிறுவனத்திற்கும் கலைஞர் டி.வி.,க்கும் இடையில் பண பரிவர்த்தனை நடந்தது கண்டு பிடிக்கப்பட்டது. அதாவது ஸ்வான் நிறுவனத்தின் மற்றொரு கிளை அலுவலகமான (சினியுக்) மூலம் 200 கோடி வழங்கப்பட்டுள்ளது.
இது குறித்து கலைஞர் டி.வி., அளித்துள்ள விளக்கத்தில் இந்த பணம் பரிவர்த்தனை கடனாக பெறப்பட்டது. பின்னர் 31 கோடி வட்டியுடன் சட்டத்திற்குட்பட்டு வருமான வரி செலுத்தி அடைக்கப்பட்டுள்ளது. இந்நிலையில் எங்களது நிறுவனத்தில் சி.பி.ஐ., அதிகாரிகள் எப்போது வேண்டுமானாலும் விசாரணை நடத்தலாம். எங்களிடம் ஆவணஙகள் முறையாக உள்ளன என்று கூறியிருந்தனர். இதனையடுத்து சென்னை அண்ணா அறிவாலயத்தில் உள்ள அலுவலகத்தில் சி.பி.ஐ. அதிகாரிகள் அதிரடி ரெய்டு நடத்தி வருகின்றனர். இதனால் தி.மு.க., கலக்கம் அடைந்துள்ளது.
இதுபோல காமன்வெல்த் போட்டி ஊழல் தொடர்பாக டெல்லியில் உள்ள உயர் அதிகாரிகள் வீடுகளிலும் ரெய்டு நடந்து வருகிறது. அதிகாலை 7 மணிக்கு ரெய்டு தொடங்கியது. காமன்வெல்த் ஒருங்கிணைப்பு குழு அதிகாரிகள் குக் ரெட்டி, ஜெயின், சக்சேனா, குப்தா, சுஜித் லால் ஆகியோரது வீடுகளில் ஒரே நேரத்தில் ரெய்டு நடைபெற்று வருகிறது.
செய்திகள்: தமிழ் கூடல்
0 கருத்துகள்:
கருத்துரையிடுக