ரூ.5 ஆயிரத்துக்கு ஆண் குழந்தை விற்பனை விலைக்கு வாங்கிய பெண் கைது

மதுரை பெத்தானியா புரத்தை சேர்ந்தவர் கணேசன், கூலி தொழிலாளி. இவரது மனைவி பூங்கொடி (வயது29). இவர்களுக்கு 2 ஆண் குழந்தைகள் உள்ளனர். இந்த நிலையில் மீண்டும் கர்ப்பமான பூங்கொடி மதுரை அரசு ஆஸ்பத்திரியில் பிரசவத்திற்காக

சேர்க்கப்பட்டார். கடந்த 3 நாட்களுக்கு முன்பு ஆண் குழந்தை பிறந்தது. இந்நிலையில் கோவையை சேர்ந்த விக்னேஷ் என்பவரின் மனைவி நித்யா (24) மதுரை அரசு ஆஸ்பத்திரிக்கு வந்தார்.பூங்கொடியை அணுகி

ஏற்கனவே உங்களுக்கு 2 ஆண் குழந்தை இருப்பதாக கேள்விபட்டேன். இப்போது 3-வது குழந்தையும் ஆண் குழந்தை பிறந்து உள்ளது. எனக்கு திருமணமாகி சில வருடங்கள் ஆகியும் குழந்தை பிறக்கவில்லை. எனவே உங்கள் குழந்தையை தந்தால் ரூ.5 ஆயிரம் தருகிறேன். 

அந்த குழந்தையை நன்றாக வளர்ப்பேன் என்று கூறியுள்ளார்.

பணத்துக்கு ஆசைப்பட்ட பூங்கொடி முன் பணமாக ரூ.3 ஆயிரத்தை வாங்கியதாக கூறப்படுகிறது. குழந்தையை யாருக்கும் தெரியாமல் கொடுக்க நினைத்த பூங்கொடி, தனது தாயார் அருகிலேயே இருந்ததால் நித்யாவிடம் குழந்தையை உடனே ஒப்படைக்க முடிய வில்லை.

இந்நிலையில் கடந்த 2 நாட்களாக மதுரையிலேயே தங்கி இருந்த நித்யா நேற்று மாலை ஒரு ஆட்டோவில் அரசு ஆஸ்பத்திரிக்கு வந்தார். சிறிது நேரத்தில் குழந்தையுடன் நித்யா ஆட்டோவிற்கு திரும்பினார். இதை அறிந்த பூங்கொடியின் தாயார் சின்னம்மாள் கூச்சலிட்டு கொண்டு ஆட்டோ அருகே வந்தார்.

அப்போது அங்கு பாதுகாப்புக்கு நின்று கொண்டிருந்த போலீசார் விரைந்து சென்று நித்யாவிடம் இருந்து குழந்தையை மீட்டு அவரிடம் விசாரித்த போது எனக்கு குழந்தை இல்லை. எனவே வளர்க்கவே வாங்க வந்தேன் என்று நித்யா கூறினார்.

இதையடுத்து போலீசார் வழக்குப்பதிவு செய்து நித்யாவை கைது செய்தனர். குழந்தையை வளர்ப்பதற்காக தான் வாங்கினாரா? அல்லது கூடுதல் விலைக்கு விற்க கடத்தினாரா? என்பது குறித்து தல்லாகுளம் மகளிர் போலீசார் விசாரணை நடத்தி வருகிறார்கள். மீட்கப்பட்ட குழந்தையை பூங்கொடியிடம் ஒப்படைக்கப்பட்டது.