முபாரக் ராஜினாமா: எகிப்தில் ராணுவம் ஆட்சியை கைப்பற்றியது

எகிப்து அதிபர் முபாரக் தனது பதவியை ராஜினாமா செய்துவிட்டு குடும்பத்துடன் கெய்ரோவில் இருந்து வெளியேறினார். ஆட்சி பொறுப்பை ராணுவம் கைப்பற்றியது.

எகிப்து நாட்டில், கடந்த 30 ஆண்டுகளாக சர்வாதிகார ஆட்சி நடத்தி வரும் அதிபர் ஹோஸ்னி முபாரக்குக்கு எதிராக மக்கள் புரட்சி வெடித்தது. கடந்த 18 நாட்களாக, தலைநகர் கெய்ரோ மற்றும் அலெக்சாண்டிரியா உள்ளிட்ட முக்கிய நகரங்களில் மக்கள் வீதியில் இறங்கி போராட்டத்தில் ஈடுபட்டனர். நேற்று முன்தினம் பொதுமக்களுக்கு உரையாற்றிய அதிபர் முபாரக், தான் பதவி விலக போவதில்லை என்று திட்டவட்டமாக மறுத்தார். இதனால், ஆத்திரத்தின் உச்சிக்கு சென்ற போராட்டக்காரர்கள் நேற்று லட்சக்கணக்கில் திரண்டு, அதிபர் மாளிகையையும், பாராளுமன்றத்தையும் முற்றுகையிட்டு, கிளர்ச்சியில் ஈடுபட்டனர். இதனால், உயிருக்கு பயந்த முபாரக் தனது குடும்பத்தினருடன் ஹெலிகாப்டரில் பாதுகாப்பான இடத்துக்கு தப்பிச்சென்றதாக தகவல் வெளியானது.

இந்த நிலையில், அதிபர் முபாரக் பதவி விலகியதாக, துணை அதிபர் உமர் சுலைமான் அறிவித்ததாக அரசு தொலைக்காட்சி அல்-ஜசீரா நேற்று இரவு அறிவித்தது. இதைத்தொடர்ந்து முபாரக்கின் 30 ஆண்டு சர்வாதிகார ஆட்சி நேற்று முடிவுக்கு வந்தது. ஆட்சியை ராணுவம் கைப்பற்றியதாகவும் அறிவிப்பு வெளியானது.

சுலைமானின் அறிவிப்பை கேட்ட, பொதுமக்களின் கிளர்ச்சி வெற்றி கொண்டாட்டங்களாக மாறியது. நாடு முழுவதும் பட்டாசுகள் வெடித்து தங்கள் மகிழ்ச்சியை வெளிப்படுத்தினர். போராட்டத்தை தலைமை தாங்கி நடத்திய நோபல் பரிசு வென்ற எல்பராடி, இதுகுறித்து கூறுகையில், எகிப்து மக்களுக்கு இந்த நாள் மிகச்சிறந்த ஒரு நாள். எகிப்து இப்போது விடுதலை அடைந்து விட்டது என்று தெரிவித்தார்.

அமெரிக்க அதிபர் ஒபாமா கூறுகையில், எகிப்தில் ஆட்சி மாற்றம் ஏற்பட வேண்டும் என மக்கள் விரும்புகின்றனர். அதன் காரணமாக முபாரக் பதவிவிலகியுள்ளார். இதனை நான் வரவேற்கிறேன். மிகவும் சிக்கலான இத்தருணத்தில் எகிப்தின் எதிர்காலம் குறித்து பல்வேறு கேள்விகள் எழும், ஆனாலும் எகிப்து மக்கள் மீது நான் மிகுந்த நம்பிக்கை வைத்துள்ளேன். அதற்கு விரைவில் தீர்வு கிடைக்கும் என்றார்

பெங்களூர் நீதிமன்றத்தில் மதானியின் ஜாமீன் மனு தள்ளுபடி

பெங்களூர், பிப். 12- பெங்களூர் உயர் நீதிமன்றத்தில் அப்துல் நசீர் மதானியின் ஜாமீன் மனு தள்ளுபடி செய்யப்பட்டது.

பெங்களூரில் கடந்த 2008-ம் ஆண்டு தொடர் குண்டு வெடிப்புகள் நடந்தன. இது தொடர்பாக, கேரளாவை சேர்ந்த மக்கள் ஜனநாயக கட்சித்தலைவர் அப்துல் நசீர் மதானி கடந்த ஆண்டு ஆகஸ்டு 17-ந் தேதி கைது செய்யப்பட்டார். தற்போது அவர் பெங்களூர் சிறையில்அடைக்கப்பட்டு இருக்கிறார்.

இந்த நிலையில் அவரை ஜாமீனில் விடக்கோரி, பெங்களூர் உயர் நீதிமன்றத்தில் மனு தாக்கல் செய்யப்பட்டது. இந்த மனுவை நீதிபதி வி. ஜெகன்நாதன் நேற்று விசாரணைக்கு எடுத்துக்கொண்டார். அப்போது அரசு வக்கீல் அசோக், "மதானி, அமைதியை குலைக்கும் குண்டு வெடிப்பு வழக்கில் தொடர்பு உள்ளவராக இருக்கிறார். கேரளாவிலும் அவர் மீது வழக்குகள் உள்ளன. தேசத்தின் பாதுகாப்பை கருதி அவரை ஜாமீனில் விடக்கூடாது" என்று வாதிட்டார். இதை நீதிபதி ஏற்றுக்கொண்டு, மதானியின் ஜாமீன் மனுவை தள்ளுபடி செய்தார். என்றாலும் அவர் உச்ச நீதிமன்றத்தில் அப்பீல் செய்து கொள்ள அனுமதி அளித்தார்

காவி மெளலானாக்கள் - சங்க்பரிவாரின் புதுமுயற்சி

ல்க்னோ,பிப்.10:முஹம்மது வாஹித் ஜிஸ்தி தலைமையில் 15 பேர்கள் அடங்கிய காவி மெளலானாக்களின் கும்பல் ஒன்று லக்னோவில் முஸ்லிம்கள் அதிகமாக வசிக்கும் மச்சாலி மஹால், மாடல் டவுன், பஈஸி மஸ்ஜித் ஆகிய பகுதிகளிலுள்ள சாக்கடை ஓடும் சந்து பொந்துகளிலெல்லாம் சிரமத்துடன் நடந்து சென்று சங்க்பரிவாரின் தத்துவத்தை பிரச்சாரம் செய்து வருகிறது.

அயர்லாந்தில் விமானம் விழுந்து நொறுங்கியதில் 6 பேர் பலி

டப்ளின், பிப். 11- அயர்லாந்தில் குட்டி விமானம் ஒன்று விழுந்து நொறுங்கியதில் 6 பேர் பலியானார்கள். 6 பேர் காயமடைந்தனர்.

வடக்கு அயர்லாந்தில் உள்ள பெல்பாஸ்ட்டில் இருந்து ஒரு குட்டி விமானம் புறப்பட்டு சென்றது. அதில், இங்கிலாந்து, ஸ்பெயின் நாடுகளை சேர்ந்த 2 விமானிகள், அயர்லாந்து அதிபர் மேரி மெக்கலிசின் உறவினர் மற்றும் அதிகாரிகள் என 12 பேர் பயணம் செய்தனர். விமானம் பறந்த போது கடும் மூடு பனி பரவி இருந்தது. எனவே, விமானம் பறக்க முடியவில்லை. இதைத் தொடர்ந்து கார்க் விமான நிலையத்தில் அந்த விமானத்தை தரை இறக்கினர் அப்போது, கட்டுப்பாட்டை இழந்த விமானம் கீழே விழுந்து நொறுங்கி தீப்பிடித்தது. இதில், அயர்லாந்து ஜனாதிபதியின் உறவினர் உள்பட 6 பேர் அதே இடத்தில் உடல் கருகி பலியாகினர். மற்றும் 6 பேர் படுகாயம் அடைந்தனர். 
 
உடனே, அனைவரும் ஆஸ்பத்திரியில் சேர்க்கப்பட்டு சிகிச்சை பெற்றனர். இந்த விபத்தில் 2 பேர் லேசான காயத்துடன் தப்பினர். விபத்து நடந்த இடத்தை பிரதமர் பிரைன் கோவன் ஹெலிகாப்டரில் சென்று பார்த்தார். அயர்லாந்தில் உள்நாட்டு குட்டி விமானம் விழுந்து நொறுங்கி விபத்துக்குள்ளானது இதுதான் முதல் முறை என்று கூறினார்

பாகிஸ்தான் ஏவுகணை சோதனை வெற்றி

இஸ்லாமாபாத், பிப். 11- அணு ஆயுதங்களை தாங்கி சுமார் 600 கி.மீ. தொலைவிலுள்ள இலக்கைத் தாக்கவல்ல ஹட்ப்-7 (பாபர்) என்கிற நவீன ஏவுகணையை பாகிஸ்தான் நேற்று வெற்றிகரமாகப் பரிசோதித்தது. உள்நாட்டிலேயே தயாரிக்கப்பட்ட இந்த ஏவுகணை மூலம் இந்தியாவிலுள்ள இலக்குகளையும் தாக்க முடியும்.

ஏவுகணை அமைப்பின் செயல்பாட்டை மதிப்பிடுவதன் ஒரு பகுதியே இந்தச் சோதனை என்று பாகிஸ்தான் அரசு தரப்பில் தெரிவிக்கப்பட்டிருக்கிறது. எனினும் இந்தச் சோதனை எங்கு நடந்தது என்பது உள்ளிட்ட விவரங்கள் வெளியிடப்படவில்லை. பாகிஸ்தானின் முப்படை அதிகாரிகள் குழுவின் தலைவர் காலித் ஷமீம் முன்னிலையில் இந்தச் சோதனை நடந்திருக்கிறது. நாட்டின் தாக்குதல் திறனை அதிகரிப்பதிலும், பாதுகாப்பை மேம்படுத்துவதிலும் இந்த சோதனை ஒரு மைல்கல் என அவர் தெரிவித்தார்.

பாதுகாப்பு தொடர்பான நடவடிக்கைகளில் பாகிஸ்தான் தொடர்ந்து உறுதியுடன் இருக்கும் என்று தெரிவித்த அவர், இந்த ஏவுகணைச் சோதனைக்கு உறுதுணையாக இருந்த அதிகாரிகளையும் விஞ்ஞானிகளையும் அதிபரும், பிரதமரும் வெகுவாகப் பாராட்டினார்கள் என்றார்.

பாபர் ஏவுகணை நவீன ரக அல்லது சாதாரண வெடிபொருள்களைத் தாங்கி, மிகக் குறைந்த உயரத்தில் பறந்து சென்று, குண்டூசி முனை அளவுத் துல்லியத்துடன் இலக்கைத் தாக்கவல்லது. ராடாரின் கண்களுக்கும் இது சிக்காது.

இந்நிலையில் பாகிஸ்தானில் உள்ள பஞ்சாப் மாநிலத்தில் குஷாப் என்ற இடத்தில் 4-வது அணுஉலைக்கூடம் கட்டும் பணி தொடங்கியது. இதன்காரணமாக அந்த நாடு மேலும் அதிகமான அணுஆயுதங்களை உற்பத்தி செய்ய முடியும். இப்போதே அந்த நாட்டிடம் 100-க்கும் மேற்பட்ட அணுஆயுதங்கள் இருக்கின்றன. இது மேலும் அதிகரிக்கும். இந்த அணுஉலைக்கூடத்தை சீனா கட்டிக்கொடுக்கிறது. இதற்கான ஒப்பந்தத்தில் இருநாடுகளும் கையெழுத்திட்டு உள்ளன. குஷாப்பில் ஏற்கனவே 2 அணு உலைக்கூடங்கள் இருக்கின்றன.

மகிந்த ராசபக்சேவிற்கு குற்றப்பத்திரிகை அனுப்பப்படும்

வாசிங்டன், பிப் இலங்கை அதிபர் மகிந்த ராசபக்சேவிற்கு குற்றப்பத்திரிகை அனுப்பி வைக்க நடவடிக்கை எடுக்கப்பட்டு வருவதாக, அமெரிக்க வழக்கறிஞர் புருஸ் பெயின் அறிக்கை வெளியிட்டிருக்கின்றார்.

மகிந்த ராசபக்சேவை முப்படைத் தளபதியாகக் கொண்டுள்ள சிறிலங்கா படைகள் தமிழ் மக்களிற்கு எதிராக மேற்கொண்ட படுகொலைகளுக்கு எதிராக கடந்த ஜனவரி மாதம் 28ஆம் தேதி அமெரிக்காவின் கொலம்பியா மாவட்ட நீதிமன்றில் வழக்குத் தாக்கல் செய்யப்பட்டிருந்தது. இந்த வழக்கின் அடுத்த கட்ட நகர்வு பற்றி அறிக்கை வெளியிட்டுள்ள, மூன்று தமிழர்கள் சார்பாக வழக்கைப் பதிவு செய்துள்ள வழக்கறிஞர் புரூஸ், முதற் கட்டமாக கொழும்பு 03, கொள்ளுப்பிட்டி முகவரியிலுள்ள அலரி(அதிபர்) மாளிகைக்கு மின்னஞ்சல் ஊடாக குற்றப்பத்திரிகை அனுப்பி வைக்கப்படும் எனத் தெரிவித்துள்ளார்.

அடுத்த கட்டமாக படுகொலைகள் தொடர்பான ஹேக் உடன்படிக்கையின் அடிப்படையில் நடவடிக்கை எடுக்க அழுத்தம் கொடுக்கப்படும் எனவும், வியன்னா தீர்மானத்திற்கு அமைவாக இராசரீக உறவுகளைக் குழப்பாத வகையில் வாசிங்கரன் டி.சி.யிலுள்ள சிறிலங்கா தூதரகத்திற்கு குற்றப்பத்திரிகை அனுப்பவும் நீதிமன்றத்திற்கு அழுத்தம் கொடுக்கப்படும் எனவும் அவர் தனது அறிக்கையில் கூறியுள்ளார்.

பெண் குழந்தை பிறந்தால் உடனே கொன்று விடுங்கள்: சல்மா அன்சாரி

பெண் குழந்தை பிறந்தால் உடனே விசம் கொடுத்து கொன்று விடுங்கள் என்று துணை ஜனாதிபதி ஹமீது அன்சாரியின் மனைவி சல்மா அன்சாரி கூறியுள்ளதால் பரபரப்பு ஏற்பட்டுள்ளது.

துணை ஜனாதிபதி ஹமீது அன்சாரியின் மனைவி சல்மா அன்சாரி. இவர் அடிக்கடி மரபுகளை மீறி கருத்து தெரிவித்து சர்ச்சைகளில் சிக்குவது வழக்கமாகி விட்டது. பெண்களுக்கான இட ஒதுக்கீடு மசோதா குறித்து கடந்த ஆண்டு தீவிரமாக விவாதம் எழுந்த போது, அந்த இட ஒதுக்கீடு எந்த பயனும் தராது என்று சல்மா அன்சாரி பேசினார். அரசு ஏராளமான திட்டங்களை கொண்டு வருகிறது. இதனால் எத்தனை பெண்கள் பயன் பெறுகிறார்கள். எனவே பெண்களிடம் விழிப்புணர்வு ஏற்படுத்தாத வரை இட ஒதுக்கீடு பயன் தராது என்றார். சல்மாவின் இந்த கருத்துக்கு கடும் எதிர்ப்பு கிளம்பியது.

இந்த நிலையில் சல்மா அன்சாரி புது சர்ச்சை ஒன்றில் சிக்கி உள்ளார். பெண் குழந்தைகளுக்கு இழைக்கப்படும் கொடுமை பற்றிய ஒரு கருத்தரங்கில் கலந்து கொண்டு அவர் பேசினார். அப்போது அவர் பெண் குழந்தைகளுக்கு எதிராக நடக்கும் குற்றங்களை தடுக்க இயலாமல் சமுதாய சூழ்நிலை உள்ளது. இதில் எனது கருத்து என்னவென்றால் பெண் குழந்தை பிறந்ததும் உடனே விசம் கொடுத்து கொன்று விட வேண்டும் என்றார். இது கருத்தரங்குக்கு வந்தவர்களை அதிர்ச்சி அடைய வைத்தது. சல்மா அன்சாரியின் பேச்சு நீதிமன்ற உத்தரவை மீறுவதாகும் என்ற சர்ச்சை எழுந்துள்ளது.

TNTJ வின் கண்டனத்தை தொடர்ந்து பாடல் வரியை நீக்கியது விஜய் டிவி

விஜய் டி.வியில் ஒளிபரப்பாகிவரும், ”மகான்” என்ற தொடரில் இடம்பெறும் பாடலில் முஸ்லிம்கள் தங்களது உயிரினும் மேலாக மதிக்கக்கூடிய நபிகள் நாயகம் (ஸல்) அவர்களை இழிவுபடுத்தும் விதமாக ஒரு பாடல் வரி இடம்பெறுவதாக தெரியவந்ததை தொடர்ந்து விஜய் டிவி நிறுவனத்தாருக்கு டி.என்.டி.ஜே கடந்த 07.02.11 அன்று கண்டன கடிதம் எழுதியதியதோடு நேரில் சென்று உடனடியாக அந்த கண்டனத்திற்குரிய வரிகளை நீக்குமாறு டி.என்.டி.ஜே நேரில் வலியுறுத்தியது.

அதைத் தொடர்ந்து அந்த கண்டனத்திற்குரிய வரியை 09.02.11 அன்று முதல் நீக்கிவிடுவதாக விஜய் டிவி நிர்வாகம் உறுதியளித்துள்ளது.

தற்போது விஜய் டிவி கூறியது போன்று அந்த பாடல் வரி மற்றும் காட்சியை நீக்கியுள்ளது. அல்ஹம்துலில்லாஹ்!

இழிவுபடுத்தும் வண்ணம் உள்ள பாடல் வரி மற்றும் காட்சி

Download

பாடல் வரி மற்றும் காட்சி நீக்கப்பட்ட வீடியோ

Download

செய்திகள்:http//www.tntj.net

40 கோடி ரூபாய் செலவில் கேரளாவில் கட்டப்படவிருக்கும் பிரம்மாண்ட மஸ்ஜித்

கோழிக்கோடு,பிப்.10:கேரளாவில் காந்தபுரத்தைச் சார்ந்த இஸ்லாமிய அறிஞர் ஏ.பி.அபூபக்கர் முஸ்லியார் தலைமையிலான ஆன்மீக மற்றும் சமூக சேவைகளில் ஈடுபட்டுவரும் அமைப்பு மர்கஸ்.

இவ்வமைப்பு சார்பாக கோழிக்கோடு மாவட்டத்திலிருந்து 10 கி.மீ தொலைவிலுள்ள காரந்தூரில் 40 கோடி ரூபாய் செலவில் பிரம்மாண்டமான மஸ்ஜித் கட்டப்படவுள்ளது. இம்மஸ்ஜிதில் ஒரே நேரத்தில் 25 ஆயிரம் பேர் தொழுகையில் பங்கேற்கலாம் என மர்கஸ் அமைப்பைச் சார்ந்தவர்கள் தெரிவிக்கின்றனர்.

இம்மஸ்ஜித் கட்டுவது தொடர்பாக பேட்டியளித்துள்ள திருச்சூரைச் சார்ந்த ஆர்க்கிடெக்ட் ரியாஸ் முஹம்மது தெரிவிக்கையில், மஸ்ஜித் கட்டுவதற்கான வரைப்படம் மற்றும் தயாராக உள்ளதாக தெரிவித்தார். 8 ஏக்கரில் கட்டப்படும் இம்மஸ்ஜிதை சுற்றிலும் பூங்கா அமைக்கப்படும். இம்மஸ்ஜித் நல்லிணக்கமும் பசுமைத் தன்மையும் எடுத்தியம்பும் வகையில் கட்டப்படும் என ரியாஸ் தெரிவிக்கிறார்.

இம்மஸ்ஜிதில் மிகப்பெரிய நூலகம், கருத்தரங்க அரங்கம் ஆகியனவும் கட்டப்படுகின்றன. இம்மஸ்ஜித் இந்தியாவின் முக்கிய கலாச்சார மையமாக திகழும் என மர்கஸ் அமைப்பினர் தெரிவிக்கின்றனர்.
news source:outlookindia

அயோத்தி வழக்கின் தீர்ப்பு மே 31 வரை நீடிக்கும் - அலகாபாத் உயர்நீதிமன்றம்

அலகாபாத்,பிப்.11:அலகாபாத் உயர்நீதிமன்றம் அயோத்தி வழக்கில் ஏற்கனவே வழங்கப்பட்ட தீர்ப்பு மே 31 வரை நீடிக்கும் என தெரிவித்துள்ளது.

அயோத்தியில் உள்ள நிலம் யாருக்கு சொந்தம் என்பது தொடர்பாக கடந்த செப்டம்பர் 30-ல் நீதிமன்றம் உத்தரவு பிறப்பித்தது. அதே நிலை மே 31 வரை நீடிக்கும் என இப்போது தெரிவித்துள்ளது.

இந்த வழக்கின் தீர்ப்பை மறு பரிசீலனை செய்யுமாறு உள்ளூர் வழக்கறிஞர் எம்.இஸ்மாயில் பரூக்கி நீதிமன்றத்தில் தாக்கல் செய்த 3 மறு ஆய்வு மனுக்களை பரிசீலித்த நீதிபதிகள் எஸ்.யு.கான், சுதிர் அகர்வால், வி.கே.தீட்சித் ஆகியோர் இந்தத் தீர்ப்பை அளித்தனர்.

முன்னதாக இந்த வழக்கில் வழங்கப்பட்ட தீர்ப்பு பிப்ரவரி 15-ம் தேதி வரை நீடிக்கும் என நீதிமன்றம் தெரிவித்திருந்தது.

கடந்த செப்டம்பர் 30-ம் தேதி உயர் நீதிமன்றம் தீர்ப்பு அளித்தபோது மேல் முறையீடு செய்ய 3 மாத கால அவகாசம் அளித்தது. அதுவரையில் நீதிமன்ற உத்தரவை செயல்படுத்தக்கூடாது என தெரிவித்திருந்தது.

ராஜேந்திர சிங், நிர்மோகி அகரா, பகவான் ராம் லாலா விராஜ்மான் ஆகியோர் தாக்கல் செய்த மனுவை ஆய்வு செய்யவேண்டும் என்று பரூக்கி தனது மனுவில் குறிப்பிட்டிருந்தார்.

அயோத்தியில் சர்ச்சைக்குரிய நிலப்பரப்பை மூன்று சம பகுதிகளாகப் பிரித்து ஹிந்துக்கள், முஸ்லிம்கள், அங்குள்ள சாதுக்களுக்கு பிரித்து அளிக்க உத்தரவிட்டது.

இப்போது ராமர் ஆலயம் உள்ள பகுதியை ஹிந்துக்களிடம் அளிக்க வேண்டும் என அதில் குறிப்பிடப்டப்டிருந்தது. இந்த வழக்கு தொடர்பாக முழு பெஞ்ச் ஏப்ரல் 28-ல் கூடும்.

இஸ்லாமிய வங்கியியலின் முக்கியத்துவம் அதிகரித்து வருகிறது - பொருளாதார வல்லுநர்

ஹைதராபாத்,பிப்.10:சர்வதேச அளவில் பொருளாதார நெருக்கடி நிலவும் சூழலில் இஸ்லாமிய வங்கியியலின் முக்கியத்துவம் அதிகரித்து வருவதாக சர்வதேச இஸ்லாமிய வங்கியியல் வல்லநர் தெரிவித்துள்ளார்.

இதர பாரம்பரிய வங்கிகளுடன் ஒப்பிடுகையில் இஸ்லாமிய வங்கிகள் 15-20 சதவீதம் அதிகளவில் வளர்ச்சியடைந்துள்ளதாக அவர் தெரிவித்தார்.

இஸ்லாமிய வங்கியல் என்பது வட்டி இல்லாமல் லாபத்தை பங்கீடுச் செய்வதாகும். இஸ்லாமிய வங்கிகளின் தற்போதைய முதலீடு 1.2 லட்சம் கோடி அமெரிக்க டாலராகும். பாரம்பரிய வங்கிகளின் மொத்த முதலீடு 243 லட்சம் கோடி அமெரிக்க டாலராகும். பாரம்பரிய வங்கிகளுடன் ஒப்பிடுகையில் இஸ்லாமிய வங்கிகளின் முதலீடு சதவீதம் 1 சதவீதத்திற்கு குறைவாகும். ஆனால், 1.2 லட்சம் கோடி அமெரிக்க டாலரை திரட்டியது கடந்த 40 ஆண்டுகளிலாகும் என்பது குறிப்பிடத்தக்கது. இது இதர வங்கிகளை விட 15-20 சதவீதம் அதிகமான வளர்ச்சியாகும் எனக்கூறுகிறார் இஸ்லாமிய வங்கியியல் வல்லுநரான மத்ஸ்லான் ஹுஸைன்.

ஹைதராபாத்தில் நடைபெறும் 17-வது காமன்வெல்த் சட்ட மாநாட்டிற்கு வருகைத் தந்திருந்தார் அவர்.

இஸ்லாமிய வங்கியியலின் முக்கியத்துவத்தை உணர்ந்து 75 நாடுகள் இதனை நடைமுறைப்படுத்தத் துவங்கியுள்ளன. இஸ்லாமிய வங்கியியலின் மையமாக விளங்கும் மலேசியா இஸ்லாமிய வங்கிகளில் செய்துள்ள முதலீடு மொத்தத் தொகையில் 22 சதவீதமாகும். சவூதி அரேபியா, பஹ்ரைன், குவைத் ஆகிய நாடுகளின் முதலீடு 20 சதவீதமாகும். சீனா, கொரியா ஆகிய நாடுகள் இஸ்லாமிய வங்கியியலை நடைமுறைப்படுத்த துவங்கிவிட்டன. கேரளாவில் இஸ்லாமிய வங்கியியல் நடைமுறப்படுத்த தீர்மானித்ததையும் ஹுஸைன் சுட்டிக்காட்டினார்.

இஸ்லாமிய வங்கி தொடங்குவதற்கான கேரள அரசின் தீர்மானத்தை சமீபத்தில் அம்மாநில உயர்நீதிமன்றம் உறுதிச் செய்திருந்தது. இஸ்லாமிய வங்கியியலுக்கு அனுமதியளிக்காததால் வெளிநாட்டிலிருந்து வரும் அதிகளவிலான முதலீடுகளை நாம் இழப்பது சரியா? எனக் கேட்கிறார் கேரள அரசுக்காக வாதாடும் வழக்கறிஞர் எல்.நாகேஷ்வரராவ்.

இஸ்லாமிய வங்கியியலைக் குறித்து ஆய்வுச்செய்ய வல்லுநர் குழுவை மலேசியாவுக்கு அனுப்பிவைக்கப் போவதாக பிரதமர் மன்மோகன்சிங் மலேசியா சுற்றுப்பயணத்தின் போது தெரிவித்ததை சுட்டிக்காட்டுகிறார் ராவ்.

சர்வதேச பொருளாதார நெருக்கடியைத் தொடர்ந்து பாரம்பரிய வங்கியான பிரபல ஸ்காட்லாந்து வங்கிப் போன்றவை இழுத்து மூடியபொழுது ஒரு இஸ்லாமிய வங்கிக்கும் நெருக்கடியை சந்திக்கவேண்டிய சூழல் ஏற்படவில்லை என தென்னாப்பிரிக்காவை மையமாக வைத்து செயல்படும் எ.எஸ்.பி.ஐ வங்கியின் டைரக்டரான எம்.ஜே.ஹுசைன் கூறுகிறார்.

செய்தி:தேஜஸ் மலையாள நாளிதழ்

உமர் சுலைமானுக்கு இஸ்ரேலுடன் ரகசிய உறவு - டெலிகிராஃப்

லண்டன்,பிப்.10:மக்கள் எழுச்சியை எதிர்கொள்ள எகிப்து சர்வாதிகாரி ஹுஸ்னி முபாரக்கினால் நியமிக்கப்பட்டவர் துணை அதிபர் உமர் சுலைமான். இவர் தினமும் இஸ்ரேலிய பிரதமர் நெதன்யாகுவை ரகசிய தொலைபேசி ஹாட்லைன் மூலமாக தொடர்புக்கொண்டு எகிப்தின் நிலைமைகள் குறித்து விவாதிப்பதாக லண்டன் டெலிகிராஃப் பத்திரிகை செய்தி வெளியிட்டுள்ளது.

விக்கிலீக்ஸ் டெலிகிராஃபிற்கு அளித்த தகவல்களின்படி 2008 ஆம் ஆண்டே உமர்சுலைமான் அமெரிக்கா மற்றும் இஸ்ரேலின் நம்பிக்கைக்குரியவராக மாறிவிட்டார் எனத் தெரியவந்தது.

முபாரக் நோயின் காரணமாக பதவி விலக நிர்பந்தம் ஏற்படும்பொழுது உமர்சுலைமான் எகிப்தின் அதிபராக வருவதுதான் நல்லது என 2008 ஆம் ஆண்டே இஸ்ரேல் பாதுகாப்புத்துறையின் ஆலோசகர் டேவிட் ஹாக்கம் தெரிவித்ததை விக்கிலீக்ஸ் வெளியிட்டிருந்தது.

ஹமாஸ் காஸ்ஸாவிற்குள் ஆயுதங்களை கடத்துவதை தடுப்பதற்கு எகிப்தின் மீது நிர்பந்தம் ஏற்பட்டபொழுது உமர் சுலைமானும், தரைப்படை ராணுவத்தளபதி தன்தாவியும் 'இஸ்ரேலின் தாக்குதலை' வரவேற்ற செய்தியையும். டெலிகிராஃப் வெளியிட்டுள்ளது.

'ஹமாஸ் தனிமைப்படுத்தப்பட வேண்டும். காஸ்ஸாவில் வாழும் மக்கள் பசியுடன் வாழவேண்டும் ஆனால் பட்டினி கிடக்கூடாது’ ("go hungry but not starve".) என உமர் சுலைமான் ஒரு முறை கூறியுள்ளதாக டெலிகிராஃப் கூறுகிறது.

செய்தி:தேஜஸ் மலையாள நாளிதழ்

ஜூலியன் அசேஞ்சை கைது செய்யும் முயற்சியில் அமெரிக்கா தோல்வி

விக்கிலீக்ஸ் நிறுவனர் ஜூலியன் அசேஞ்சை எவ்விதத்திலாவது கைது செய்துவிட வேண்டும் என, அமெரிக்காவின் முயற்சி தோல்வியடைந்து வருவதாக தகவல்கள் தெரிவிக்கின்றன.

கடந்தாண்டு, ஜூலியன் அசேஞ் தனது விக்கிலீக்ஸ் இணையதளத்தில், அமெரிக்க வெளியுறவுத் துறை, ஆப்கானிஸ்தான் மற்றும் ஈராக் போர்கள் குறித்த ரகசிய ஆவணங்களை வெளியிட்டார். இந்த ஆவணங்களை அமெரிக்க அரசிடம் திருடி அசேஞ்சிடம் கொடுத்ததாக அமெரிக்க ராணுவ வீரர், ப்ரேட்லி மேனிங் (22) என்பவர் கைது செய்யப்பட்டார். விசாரணையில், அவருக்கும், அசேஞ்சுக்கும் தொடர்பு இருப்பதற்கான எவ்வித ஆதாரமும் கிடைக்கவில்லை. அசேஞ்ச் சொல்லி தான் மேனிங், ஆவணங்களை திருடியதாக இவ்வழக்கை அமெரிக்க தரப்பு ஜோடிக்க முயல்கிறது. அதன் மூலம் தான் சட்டரீதியாக, விசாரணை என்ற பெயரில், அசேஞ்சை கைது செய்து, அமெரிக்கா கொண்டு வர முடியும். ஆனால், இருவருக்கிடையிலான தொடர்பு பற்றிய ஆதாரங்கள் கிடைக்காததால் அமெரிக்காவின் முயற்சி தோல்வியடைந்து வருகிறது

தமிழ் – முஸ்லீம் கலாச்சாரங்களுக்கு இடமில்லாத சிறீலங்காவின் புதிய நாணயங்கள் ( புகைப்படங்கள் )

தமிழ் – முஸ்லீம் கலாச்சாரங்களுக்கு இடமில்லாத சிறீலங்காவின் புதிய நாணயங்கள் ( புகைப்படங்கள் )

சிறீலங்காவிற்கு வெளிநாடுகளில் இருந்து போவோர்அங்கு தற்போது அமலுக்கு வந்துள்ள புதிய நாணயங்களை அறிவது அவசியமாகும். சிறீலங்கா பொருளாதாரம் 5000 ரூபா நோட்டுக் கலாச்சாரத்திற்குள் போகிறது. விரைவில் அது 10.000 ரூபா நோட்டு கலாச்சாரத்திற்கு போனாலும் ஆச்சரியப்பட எதுவும் இல்லை. மேலும் இந்த நாணயங்களை புரட்டிப் புரட்டிப் பார்த்தால் தமிழில் இவற்றின் பெறுமதி குறிப்பிடப்பட்டுள்ளது. ஆனால் அங்கு புத்த சமயத்தையும், சிங்கள கலாச்சாரத்தையும் விட வேறு ஏதாவது கலாச்சாரங்கள் இருக்கிறதா என்பதை அறிய நாணயத்தில் யாதொரு இடமும் காணப்படவில்லை. சாதாரண குருவிகளுக்கும், வண்ணத்து பூச்சிகளுக்கும் உள்ள இடம் கூட தமிழ் கலாச்சாரத்திற்கும், இஸ்லாமிய கலாச்சாரத்திற்கும் ஒதுக்கப்படவில்லை. இந்துக் கோயில்கள், மசூதிகள், தேவாலயங்கள் போன்றனவும் இடம்பெற வேண்டுமென யாரும் எண்ணியதாக தெரியவில்லை. மத சமரசம், இன சமராசம், கலாச்சார சமரசம் போன்றவற்றை நாணயத்தில் ஏற்படுத்தாமல் உள்ளத்தில் இருப்பதாக மேடைக்கு மேடை முழங்கி என்ன பயன் ? மேலும் கண்டி நடனம் மட்டுமா இலங்கையின் நடனம் என்பதைக்கூட கேட்கப்பார்க்க ஆளில்லாத அவலமே நிலவுவதையும் இந்த நாணயங்கள் உணர்த்துகின்றன.. இதோ நாணயங்கள் :

Written by Thurai · Filed Under News   நன்றி:24துனியா

பாகிஸ்தான் ராணுவ முகாமில் குண்டுவெடிப்பு: 27 பேர் பலி

இஸ்லாமாபாத் பாகிஸ்தானில் இன்று அதிகாலை நடந்த குண்டு வெடிப்பில் 27 பேர் கொல்லப்பட்டனர். 20க்கும் மேற்பட்டோர் காயமுற்றனர்.

பாகிஸ்தான் பஞ்சாப் மாநிலம் மர்தான் நகரப்பகுதியில் உள்ளது பாகிஸ்தான் ராணுவ ஆட்கள் தேர்வு செய்யும் மையம். இங்கு வழக்கம்போல் அதிகாலையில் ராணுவ வீரர்கள் பயிற்சியில் ஈடுபட்டிருந்தனர். இந்நேரத்தில் அங்கு பலத்த சப்தத்துடன் குண்டு வெடித்தது. இதில் சற்றும் எதிர்பாராத வீரர்கள் பலர் சிக்கினர். சம்பவ இடத்திலேயே ராணுவ வீரர்கள் 10 பேர் பலியாயினர். 40க்கும் மேற்பட்ட ராணுவ வீரர்கள் அருகில் உள்ள மருத்துவமனைக்கு கொண்டு செல்லப்பட்டனர். தற்போது 27 பேர் இறந்து விட்டதாக அதிகாரப்பூர்வ தகவல் தெரிவிக்கிறது. குண்டு வெடிப்பை மனித வெடிகுண்டு நடத்தியிருக்கலாம் என போலீஸ் தரப்பில் கூறப்படுகிறது. தலிபான் இயக்கத்தினர் தான் இது போன்ற செயலில் ஈடுபடுவார்கள் என்று போலீசார் கூறினாலும் எந்தவொரு பயங்கரவாத அமைப்பினரும் இதுவரை பொறுப்பேற்கவில்லை.

இங்கு தாக்குதல் நடத்திய நபர் ஒருவர் பள்ளிச்சீருடையில் வந்துள்ளான். இளம் வயதான இந்த மனிதகுண்டு மாணவன் போல ராணுவ முகாம் அருகே நெருங்கியுள்ளான் என போலீசார் விசாரணையில் தெரிய வந்துள்ளது. ராணுவ முகாம் மீது நடந்த தாக்குதலை அடுத்து பாகிஸ்தானில் பாதுகாப்பு படையினர் நாடு முழுவதும் உசாராக இருக்குமாறு கேட்டுக்கொள்ளப்பட்டுள்ளனர்.

இந்த சம்பவத்திற்கு பாகிஸ்தான் பிரதமர் யூசப் ரசா கிலானி கடும் கண்டனம் தெரிவித்துள்ளார். அவரது அறிக்கையில், இது போன்ற கோழைத்தனமான தாக்குதல் எங்களின் பாதுகாப்பு படையினரின் மன உறுதியை தகர்க்க முடியாது. தொடர்ந்து பயங்கரவாதத்தை ஒழிக்க முயற்சி மேற்கொளப்படும் என்றார்.

இந்திய மாணவர்கள் காலில் கட்டப்பட்ட கண்காணிப்பு கருவி அகற்றம்

அமெரிக்காவில் 2 இந்திய மாணவர்கள் காலில் கட்டப்பட்டிருந்த கண்காணிப்பு கருவி அகற்றப்பட்டது.

அமெரிக்காவில் கலிபோர்னியா நகரில் உள்ள திரிவேலி பல்கலைக்கழகத்தில் படித்த இந்திய மாணவர்கள் போலி விசாவில் வந்ததாக கைது செய்யப்பட்டனர். அவர்களின் கால்களில் கண்காணிப்பு கருவியை போலீசார் கட்டி இருந்தனர்.  இது தொடர்பாக இந்திய வெளியுறவு துறை சட்ட ரீதியாக எடுத்த நடவடிக்கையால் 2 மாணவர்கள் காலில் கட்டப்பட்ட கண்காணிப்பு கருவி அகற்றப்பட்டது

பினாயக் சென்னுக்கு பிணை வழங்க நீதிமன்றம் மறுப்பு

ராய்ப்பூர் நக்சலைட்டுகளுக்கு உதவியதாகக் கூறி குற்றம்சாற்றப்பட்டு, தேசத் துரோகப் பிரிவின் கீழ் ஆயுள் தண்டனை விதிக்கப்பட்ட மனித உரிமைப் போராளியும், மருத்துவருமான பினாயக் சென்னிற்கு பிணையில் விடுதலை அளிக்க சட்டீஸ்கர் உயர் நீதிமன்றம் மறுத்துள்ளது.

பினாயக் சென், நாராயன் சன்யால், பியூஸ் குஹா ஆகியோர் மீதான வழக்கில் அவர்கள் நாட்டிற்கு எதிராக சதி செய்து, போரில் ஈடுபட முயன்றார்கள் என்று கூறி, இந்திய தண்டனைச் சட்டப் பிரிவுகள் 124ஏ, 120பி ஆகியவற்றின் கீழ் குற்றவாளிகளாக அறிவித்த ராய்ப்பூர் நீதிமன்ற நீதிபதி வர்மா, கடந்த டிசம்பர் மாதம் 24 ஆம் தேதி ஆயுள் தண்டனை வழங்கித் தீர்ப்பளித்ததார்.

இதனையடுத்து பினாயக் சென்னை பிணையில் விடுதலை செய்யவேண்டும் என்று சட்டீஸ்கர் உயர் நீதிமன்றத்தில் மனு செய்யப்பட்டது. இன்று தீர்ப்பளித்த நீதிபதிகள் டி.பி.சர்மா, ஆர்.எல்.ஜன்வர் ஆகியோர் பிணை மனுவை நிராகரிப்பதாகத் தீர்ப்பளித்தனர்.

இந்தத் தீர்ப்பு குறித்து பினாயக் சென் தாயார் அனுசுயா சென் கூறுகையில், "பிணை மனு நிராகரிக்கப்படும் என்பது எதிர்பார்க்கப்பட்டதுதான், இதனால் நான் ஏமாற்றமடையவில்லை. உச்ச நீதிமன்றத்தில் மேல் முறையீடு செய்வோம் அங்கு நீதி கிடைக்கும் என்று நம்புகிறோம்" என்றார்

சுனில் ஜோஷி கொலை: சூத்திரதாரி ஆர்.எஸ்.எஸ் மூத்த தலைவர் இந்திரேஷ்குமார்

புதுடெல்லி,பிப்.9:இந்தியாவில் பல்வேறு இடங்களில் நடத்திய குண்டுவெடிப்புகளின் ஆதாரங்களை அழிப்பதற்காக ஆர்.எஸ்.எஸ் பிரச்சாரக் சுனில்ஜோஷியை கொலைச்செய்ய திட்டமிட்டது ஆர்.எஸ்.எஸ் பயங்கரவாத அமைப்பின் தேசிய செயற்குழு உறுப்பினரும், அவ்வமைப்பின் மூத்த தலைவருமான இந்திரேஷ் குமார்தான் என்பது ராஜஸ்தான் ஏ.டி.எஸ் நடத்திய விசாரணையில் தெரியவந்துள்ளது
குண்டுவெடிப்பு வழக்குகள் தொடர்பாக ராஜஸ்தான் மாநில ஏ.டி.எஸ் கைதுச்செய்த ஹிந்துத்துவ பயங்கரவாதியான பரத் மோகன்லால் ரதேஷ்வர் அளித்த குற்ற ஒப்புதல் வாக்குமூலத்தில் இதனை தெரிவித்துள்ளான்.

ஏற்கனவே இவ்வழக்கில் கைதான அஸிமானந்தா அளித்த குற்ற ஒப்புதல் வாக்குமூலத்தைப் போன்றே ரதேஷ்வரும் அளித்துள்ளது குறிப்பிடத்தக்கதாகும்.

இந்தியாவின் பல்வேறு பகுதிகளில் குண்டுவெடிப்புகளை நடத்துவதற்கு தேவையான பணத்தை ஏற்பாடுச் செய்துக் கொடுத்தது ரதேஷ்வர்தான் என்பதை ராஜஸ்தான் ஏ.டி.எஸ் கண்டறிந்துள்ளது.

கடந்த வெள்ளிக்கிழமை குஜராத் மாநிலம் வால்ஸாதிலிருந்து ரதேஷ்வர் கைதுச் செய்யப்பட்டான். ரதேஷ்வரின் வாக்குமூலத்தையும் குற்றப்பத்திரிகையுடன் ராஜஸ்தான் ஏ.டி.எஸ் நீதிமன்றத்தில் ஒப்படைத்துள்ளது.

கடந்த 2007-ஆம் ஆண்டு மத்தியபிரதேச மாநிலம் தேவாஸில் வைத்து ஆர்.எஸ்.எஸ் பிரச்சாரக்கான சுனில்ஜோஷி குண்டடிப்பட்டு இறந்துபோனான். ஆர்.எஸ்.எஸ்ஸின் கட்டளையின்படி இந்தியாவின் பல்வேறு பகுதிகளில் குண்டுவெடிப்புகளை தலைமையேற்றவன் சுனில்ஜோஷி.

குண்டுவெடிப்புகளில் ஆர்.எஸ்.எஸ்ஸின் பங்கு வெளியாகுவிடும் என அஞ்சி ஆர்.எஸ்.எஸ்காரர்களே ஜோஷியை கொலைச் செய்தனர் என்பது விசாரணையில் தெரியவந்தது.

இதுத் தொடர்பாக ஜோஷியுடன் தங்கியிருந்த 4 பேரில் ஒருவரான ஹர்ஷத் சோலங்கி உள்பட 3 பேர் கைதுச் செய்யப்பட்டிருந்தனர். வதோதரா பெஸ்ட் பேக்கரி வழக்கில் சோலங்கி முக்கிய குற்றவாளியாவான்.

ஜோஷி கொலைச் செய்யப்பட்ட தகவலை அன்றைய இரவில் ஆனந்த்ராஜ் என்ற நபர் ஒருவர் தொலைபேசியில் தொடர்புக்கொண்டு தன்னிடம் தெரிவித்ததாக சி.ஆர்.பி.ஸி 151,154 படி பதிவுச் செய்யப்பட்ட வாக்குமூலத்தில் ரதேஷ்வர் கூறியுள்ளான்.

"ஆனால், அப்பொழுது ஜோஷிதான் கொலைச் செய்யப்பட்டார் என்பது எனக்கு தெரியாது. மறுநாள் பத்திரிகையில் புகைப்படத்துடன் செய்தி வெளியானபோது, இவர் நம்முடன் தங்கியிருந்த மனோஜ் அல்லவா?(ஆர்.எஸ்.எஸ் உறுப்பினர்கள் ஜோஷியை மனோஜ் என்றுதான் அழைப்பார்கள்) என்பது தெரியவந்தது. பின்னர் நான் பிரக்யாசிங்கை அழைத்தேன். அப்பொழுது அவர் ஜோஷி கொலைச் செய்யப்பட்டதை உறுதிச்செய்தார். அதன் பின்னர் அஸிமானந்தாவை அழைத்தேன். அவர் ஜோஷி கொலைச் செய்யப்பட்டதில் அதிருப்தியாக இருந்தார். ஜோஷியை கொலைச் செய்தது இந்திரேஷ்குமார்தான் என அஸிமானந்தா என்னிடம் தெரிவித்தார்.

இந்திரேஷிற்கு ஜோஷியை பிடிக்காது. இக்காரியத்தை விரைவாக கர்னல் புரோகித்தை அழைத்துக் கூறுமாறு நான் அஸிமானந்தாவிடம் தெரிவித்தேன். ஜோஷி எனது வால்ஸாத் வீட்டில்தான் தங்கியிருந்தார்.

அஜ்மீர் குண்டுவெடிப்பு நிகழ்ந்த இரவு ஜோஷி என்னை தொலைபேசியில் அழைத்தார். அவர்களுக்கு ஒரு வேலையை கொடுத்திருக்கிறோம் எனவும், தொலைக்காட்சியை பார்க்கவும் என்னிடம் ஜோஷி தெரிவித்தார். அச்செய்தி அஜ்மீரில் நிகழ்ந்த குண்டுவெடிப்பாகும்.

வெளிநாட்டில் வேலைப்பார்த்து வந்த நான் இந்தியாவிற்கு திரும்பி வந்தபொழுது தேஷ்முக் பாய் என்பவர் மூலமாக அஸிமானந்தாவுக்கு அறிமுகமானேன். வால்ஸாதில் வீடுகட்ட நிலத்தை வாங்கியபொழுது அங்கு பூஜைகளை செய்தது அஸிமானந்தாவார். தொடர்ந்து அவருடனான உறவு நீடித்தது. 2006-ஆம் ஆண்டு அஸிமானந்தாவின் ஆசிரமத்தில் வைத்து விவேகானந்தரின் புகைப்படக் கண்காட்சி ஒன்றை நடத்தினேன். அங்கே வைத்துதான் பிரக்யாசிங் மற்றும் சுனில் ஜோஷிக்கு அறிமுகமானேன்.

2007 ஆம் ஆண்டு தீபாவளிக்கு முந்திய இரவில் ஜோஷி எனது வீட்டிற்கு வந்திருந்தார். அவருடன் ஒரு சிறுவனும் உடனிருந்தான்." இவ்வாறு ரதேஷ்வர் தனது வாக்குமூலத்தில் கூறியுள்ளான்.

செய்தி:தேஜஸ் மலையாள நாளிதழ்

முபாரக் எகிப்தை விட்டு வெளியேறப் போவதாக ஜெர்மன் பத்திரிகை

கெய்ரோ,பிப்:எகிப்து நாட்டு சர்வாதிகாரி ஹுஸ்னி முபாரக் தனக்கு எதிராக தொடர்ந்து நடத்தப்பட்டு வரும் மக்கள் திரள் போராட்டத்தைத் தொடர்ந்து நாட்டை விட்டு வெளியேறி ஜெர்மனிக்கு செல்லவிருப்பதாக ஜெர்மனியிலிருந்து வெளியாகும் ஸ்பீகல் பத்திரிகை தெரிவிக்கிறது.

மருத்துவ சோதனை என்ற பெயரில் முபாரக் வெளியேறவிருப்பதாகவும், இதற்காக ஜெர்மனியில் ஆடம்பர க்ளீனிக்கில் தங்க விருப்பதாகவும் அப்பத்திரிகை தெரிவிக்கிறது.

இதுக்குறித்து அமெரிக்க அரசும் முபாரக் அரசும் பேச்சுவார்த்தை நடத்தியுள்ளன. முன்பு ஈரானில் புரட்சி ஏற்பட்ட பொழுது அந்நாட்டு சர்வாதிகாரி ஷா பஹ்லவி மருத்துவ சிகிட்சை என்ற பெயரில் நாட்டை விட்டு வெளியேறி அமெரிக்கா சென்றார் என்பது குறிப்பிடத்தக்கதாகும்.

செய்தி:கல்ஃப் நியூஸ்

அடுத்த ஊழல்: இஸ்ரோ அலை ஒதுக்கீட்டி​ல் ரூ.2 லட்சம் கோடி இழப்பு

டெல்லி,பிப்.:தொலைத் தொடர்பு துறையில் 2-ஜி ஸ்பெக்ட்ரம் ஒதுக்கீட்டில் ரூ. 1 லட்சத்து 76 ஆயிரம் கோடி இழப்பு ஏற்பட்டதாக மத்திய பொது கணக்கு தணிக்கை துறை கூறியது. இந்த விவகாரம் விசுவ ரூபம் எடுத்து நாட்டையே உலுக்கி கொண்டிருக்கிறது. முன்னாள் மத்திய மந்திரி ஆ.ராசா மற்றும் அதிகாரிகள் கைது செய்யப்பட்டு உள்ளனர்.

இதே போன்ற முறைகேடு மத்திய விண்வெளி ஆராய்ச்சி துறையான இஸ்ரோவிலும் நடந்து இருப்பதை மத்திய தணிக்கை துறை கண்டு பிடித்து உள் ளது. தொலை தொடர்பு துறை போலவே இஸ்ரோவிலும் அலைவரிசை