இங்கிலாந்து தூதரகம் மீது ராக்கெட் தாக்குதல்

எமன் தலைநகரம் சனாவில் உள்ள இங்கிலாந்து தூதரகம் மீது இன்று தீவிரவாதிகள் ராக்கெட் தாக்குதல் நடத்தியுள்ளனர். இன்னொரு தாக்குதலில் ஒரு பிரான்ஸ் ஊழியர் கொல்லப்பட்டுள்ளார். இந்த ராக்கெட் தூதரகத்திலுள்ள வாகனத்தின் மீது விழுந்ததாகவும் அதிலிருந்த ஒரு இங்கிலாந்து நாட்டவர் காயமடைந்திருப்பதாகவும் இங்கிலாந்தின் வெளியுறவுத் துறை தெரிவித்துள்ளது. ஜனாதிபதி அலி அப்துல்லாஹ் ஸாலேஹ் இந்தத் தாக்குதல் சம்பந்தமாக இங்கிலாந்து தூதரிடம் நேரில் சந்தித்து உரையாடினார்.
மற்றொரு சம்பவத்தில் OMV என்ற எண்ணெய் நிறுவனத்தில் வேலை செய்து வந்த ஒரு பாதுகாவலர் திடீரென துப்பாக்கியை எடுத்து அங்கிருந்தவர்களைச் சுட்டதில் அங்கு வேலை செய்து கொண்டிருந்த ஒரு பிரான்ஸ் நாட்டவர் கொல்லப்பட்டார். அரசு பாதுகாப்பு படையினர் உடனே துப்பாக்கி சூடு நடத்தியவரை கைது செய்தனர். அல்காய்தாவுக்கும் எமன் அரசு படையினருக்குமிடையே தொடர்ந்து சண்டைகள் நடந்து கொண்டிருந்தாலும் அல் காய்தா பெரும்பாலும் எமனில் உள்ள மேற்கத்திய நாட்டினரை குறி வைத்து தாக்குதல் நடத்தி வருகின்றனர்

கடந்த ஏப்ரலில் தற்கொலை குண்டுதாரி ஒருவர் இங்கிலாந்து தூதரைக் குறி வைத்து நடத்திய தாக்குதலில் மூவர் காயமடைந்தனர். இங்கிலாந்து தூதர் அரேபியா தீபகற்பத்தில் முஸ்லிம்களுக்கெதிரான போரை நடத்துவதில் முன் நிற்பதால் அவர் மீது தாக்குதல் நடத்தியதாக அல் காய்தா அப்போது தெரிவித்திருந்தது. 2008 ஆம் ஆண்டு அமெரிக்க தூதரகம் மீது நடத்தப்பட்ட தாக்குதலில் 16 பேர் கொல்லப்பட்டனர்